Aralin 47

Aralin 47

Pinanggalingan ng mga produkto at inndustriya sa kinabibilangang lungsod at bayan sa rehiyon

Ang bawat lungsod sa Pambansang Punong Rehiyon ay may kani-kaniyang produktong maipagmamalaki. Bagaman salat sa likas na yaman dahil sa kaanyuang pisikal nitong kapatagan, ito ang naging sentro ng pamahalaan, edukasyon, pagbabangko, industriya at pangkalusugan.

Dito matatagpuan ang pinakamaraming mahalagang yaman ng bansa, ang yamang tao.

Ang Lungsod ng Navotas at Malabon ay malapit sa katubigan kaya ang mga it ay sagana sa mga yamang tubig tulad ng hipon at iba't ibang uri ng isda, alimango, tahong, at iba pang pagkaing tubig-dagat.

Kilala ang Lungsod ng Navotas sa produkto nitong patis at bagoong.

Sa Lungsod ng Malabon naman ay ang ipinagmamalaki nitong Pansit Malabon at mga kakanin lalo na ang sapin-sapin na dinarayo ng mga kalapit lungsod o bayan.

Ang Lungsod ng Muntinlupa ay kilala rin sa paggawa ng sumang munti at longganisang munti.

Ang Lungsod ng Las Piñas ay kilala sa pagawaan ng asin.

Ang paggawa ng itlog na maalat at balut mula sa itlog ng itik ay ang pangunahing hanapbuhay naman ng mga taga Pateros sapagkat maraming nag-aalaga ng itik sa kanilang bayan.