Pagiging Masinop

​

Pagiging Masinop

By Christian Galay

​Si Agatha Maaksaya

​

​Ito si Agatha. Siya ay masayang naglalaro ng tubig sa gripo sa labas ng

kanilang bahay. Mag- iisang oras nang nakabukas ang gripo at patuloy lamang

ang pagsalok niya ng tubig sa kaniyang maliit na tabo at isinasalin ito sa maliit na lalagyan.

​Maya-maya pa ay nakita siya ng kaniyang Nanay, “Agatha! Isara mo ang gripo! Huwag ka mag-aksaya ng tubig!” “Mamaya na ’Nay!” sagot ni Agatha. “Marami naman po tayong tubig ‘di ba?”. Sumagot ang kaniyang nanay, “Anak, hindi magandang nag-aaksaya ng tubig. Tigilan mo na ‘yan at kakain na tayo.”

​Malungkot na isinara ni Agatha ang gripo ng tubig at dali-daling pumasok sa kanilang bahay.

​Pagkatapos niyang magpunas ay umupo na siya upang mananghalian. Sa gutom niya ay kumuha siya ng napakaraming kanin. “Mauubos mo ba ’yan?” tanong ng tatay niya. “Hindi magandang nag-aaksaya ng pagkain, anak.” Napaisip si Agatha.

Madalas nga niyang hindi maubos ang pagkain na kaniyang kinukuha kaya ito ay nasasayang. Mulin siyang tumayo at ibinalik ang kanin na sa tingin niya ay hindi niya mauubos. “Pasensiya na po, tatay. Kukuha na lang po ako ng pagkain na kaya kong ubusin.” “Ganiyan nga, anak”, wika ng tatay. “Mahalaga ang pagiging masinop sa lahat ng bagay na ating ginagamit, tulad ng tubig, koryente at pagkain. Hindi natin dapat ito inaaksaya. Dapat tayo ay maging matipid at maingat sa lahat ng bagay na mayroon tayo.” At masayang nananghalian ang mag-anak.​

​

Multiple Choice

Anong ugali ang ipinakita ni Agatha sa kuwento?

• Pagiging masinop

• Pagiging mapagbigay

• Pagiging maaksaya

• Pagiging matulungin