Кантрольная тэставая работа 9 клас (Варыянт 2)

Адзначце правільныя сцверджанні:

• У складаным сказе з рознымі відамі сувязі граматычныя часткі могуць звязвацца толькі злучнікавай сувяззю.

• Граматычныя часткі складанага сказа раздзяляюцца пераважна коскай.

• Сувязь паміж граматычнымі часткамі ў складаназлучаных сказах называецца злучальнай, а ў складаназалежных- падпарадкавальнай.

• Залежная частка ў саставе складаназалежнага сказа называецца галоўнай, а незалежная даданай.

Адзначце складаныя сказы:

• Самалёты праз хвіліну зніклі ў далечы, аднак неўзабаве яны зноў вярнуліся.

• Вецер ірваў з узгоркаў пульхны мяккі снег, кідаў куды-небудзь у зацішныя куткі, там прасаваў з яго грывастыя сумёты.

• Пакуль мы назбіралі сушняку і расклалі вогнішча, дзяўчаты падрыхтавалі вячэру.

• Бруснічнік рос у лагчынах, на купінах, на старых, аброслых мохам пнях, нават на вываратнях дрэў.

Адзначце правільныя сцверджанні:

• Часткі, якія ўваходзяць у складаназлучаны сказ, могуць звязвацца пры дапамозе спалучальных, супраціўных, размеркавальных злучнікаў.

• У складаназлучаным сказе з разнатыпнымі часткамі адна частка нагадвае сваёй будовай двухсастаўны сказ, а другая- аднасастаўны.

• Паміж часткамі складаназлучанага сказа ставіцца толькі коска і кропка з коскай.

• Коска ставіцца ў складаназлучаным сказе, калі ў ім ёсць агульны член, які аднолькава адносіцца да кожнай часткі.

Адзначце складаназлучаныя сказы з аднатыпнымі часткамі:

• Іду, а неба нізкае, а ночка сінякрылая, і ўсё да болю блізкае, і ўсё – старонка мілая!

• Удзень горача, а ўначы холадна.

• Янка Купала любіў нас, маладых паэтаў, і мы заўсёды адчувалі бацькоўскую ўвагу яго да нас.

• У лесе адразу павесялела, а на пясчаных грудах зноў заззяў верас.

Адзначце складаназлучаныя сказы, у якіх правільна пастаўлены знакі прыпынку:

• У даліне апускаецца туман, або пачынае марасіць даждж.

• Адкуль вы ідзяце і хто вы такія?

• Зайшоў дзед праз веснічкі і сам зачыніў браму.

• Агонь раскладалі не адзін раз і жар аблізаў бліжні бок ядлоўцу ад зямлі да самага верху.

Адзначце складаназалежныя сказы (знакі прыпынку не пастаўлены):

• Птушачка сваімі спевамі давала натхненне… як даўней гаварылі… песнярам усіх краёў зямлі.

• Будыніна выглядала так… як бы ў ёй хтосьці жыў.

• Рэчку… як відаць… пачынаюць засяляць бабры.

• Алесь хадзіў каля крынічкі… што з лесу тут жа выцякала.

Адзначце сказы, у якіх трэба паставіць дзве коскі:

• Будаўнікі хваляваліся бо калі ліўні не перастануць то падрыхтаваны пад фундамент катлаван ператворыцца ў балота.

• Вясною калі жаўцелі палі і прастарнелі лугі вецер атрасаў з дубоў жалуды і лісце.

• Хлопцы спяшаліся каб пакуль прыедуць бацькі паспець прыбрацца.

• Рабочыя дазволілі сабе адпачыць бо калі не лічыць укладкі падлогі работу сваю яны выканалі.

Адзначце сказы з сузалежным падпарадкаваннем даданых частак:

• На самай сярэдзіне разліву, дзе праходзіла рэчышча і дзе плынь была асабліва хуткая, круцілася невялікая лодка.

• Помню з даўніх часоў, як збіраліся птушкі ў палёт, як вучылі буслы летуноў шнур цягнуць да заморскіх шырот.

• Падрастае, цягнецца да сонца і лес- маладняк, што пасадзілі калгаснікі на тым месцы, дзе раней шумеў прыгажун-бор.

• Мы гаворым пра мір і змагаемся за яго, бо ведаем, што такое вайна.

Адзначце бяззлучнікавыя складаныя сказы:

• Неба сеяла цяпло, цёплы дожджык церушыў, у думках радасна было, беглі песні ад душы.

• Хочаш жыць у святле і цяпле – сам здабывай агонь для сябе.

• Вялікая ўдача – сустрэць сябра на ўсё жыццё.

• Скіраваць свой погляд да зорак – не значыць да іх даляцець.

Адзначце бяззлучнікавыя складаныя сказы, у якіх на месцы пропускаў трэба паставіць двукроп’е:

• На вёсцы чуліся ранішнія гукі…. недзе скрыпнуў калодзежны журавель, бразнулі хатнія дзверы.

• Адбіраюць у чалавека любімую працу… пустым становіцца яго жыццё.

• Ветрык краскі чуць калыша… травы шалясцяць.

• Усяму народу, краю ўрачыста абяцаю… для радзімы-маткі сіл сваіх не пашкадую.