Орталық мемлекеттік кинобейне-дыбыс жазбалары мұрағаты – республикалық мәдени-анықтамалық мекеме. Бұл мұрағатты тарихи деректердің қоймасы деуімізге болады. Онда деректі фильмдер, киножурналдар, бейнесуреттер, дыбыстық жазба құжаттар сақталған. Мұрағат 1943 жылдың қаңтар айында ұйымдастырылған. 1957 жылдың соңында Қазақстан Орталық мемлекеттік мұрағатының бөлімшесіне айналды. 1974 жылы ақпан айында қайтадан жеке мекеме болып бөлініп шықты. Киноқұжаттардың шежірелік қамтылуы 1925 жылдан басталады. Алғашқы туындылардан «Қазақстанның бес жылдығы», «Октябрьдің Қазақстандағы он жылдығы», «Тоғысу» тағы да басқа деректі фильмдер бар. Мұрағат киноқорында екінші дүниежүзілік соғыс кезінде Алматы қаласындағы біріккен орталық киностудиясы шығарған туындылар мен соғыстан кейінгі республика өміріндегі маңызды оқиғалар мен тарихи деректерді қамтитын киноқұжаттар жинақталған. Қоғам өмірінің әртүрлі саласын қамтитын бейнеқұжаттарда ХХ ғасырдың басынан бергі қазақ халқының тұрмысы мен тіршілігін бейнелейтін өңделген бейне суреттер мен қалалардың көріністері сақталған. ХХ ғасырдың бас кезінен бергі бейнеқұжаттарда Қазақстанның мәдени, саяси-экономикалық өмірі және ашаршылық жылдары мен тың жерлерде ұйымдастырылған кеңшарлармен танысуға болады. 1953 жылдан бастап дыбыстық құжаттар сақталып келеді. Бұл құжаттар кешенінде, негізінен, партия форумдары мен мерейтойлар, қоғам қайраткерлерінен жазып алынған естеліктер бар. Бұл мұрағатта «Біржан – Сара», «Абай» опералары сияқты музыкалық шығармалардың мәтіндері де жазылып алынып, сақталған. Құрманғазы мен Дина күйлерінің, Әміре Қашаубаевтың 1925 жылы Парижде орындаған әндерінің жазбалары ерекше құнды дүниелер болып табылады. Мұрағаттың ғылыми-анықтамалық аппараты жүйелік, атаулық каталогтерден, киножурналдардың түсініктеме берілген тізбелерінен тұрады.

1. Мәтінде жауабы бар сұрақты таңдаңыз.