Herrialde garatuetan, biztanleriaren zati txiki bat (%10 inguru) bakarrik aritzen da lehenengo sektorean; herrialderik pobreenetan, berriz, %50eraino ere iristen dira batzuetan.

Artisautza izan zen industriaren lehen modua XVIII. mendera arte, industria modernoa orduan hasi baitzen. Bigarren sektorea izan zen ekonomiaren sektore nagusia XX. mendearen bigarren zatira arte; gaur egun, biztanleriaren %30 inguru aritzen da sektore honetan herrialde garatuetan, baina %10 besterik ez garapen bidean dauden herrialdeetan.

Gaur egun, gizarte garatuetako sektore ekonomiko nagusia da hirugarren sektorea, eta biztanleriaren %60 ingururi ematen dio lana. Aldiz, herrialde azpigaratuetan, biztanleriaren %10 eta %40 bitartean aritzen dira era honetako jardueretan (batez ere merkataritza txikian).