Bima Bungkus

Duhkitaning Prabu Pandu Dewanata lan Dewi Kunti jalaran laire ponang jabang bayi kang awujud bungkus. Tan ana sanjata kang tumama kanggo mbedah bungkus. Kurawa uga melu cawe- cawe arsa mecah bungkus, sanadyan amung lelamisan, bakune arsa nyirnakake si bungkus. Permadi banjur kautus sowan eyange Resi Abiyasa ing Sapta Arga, wisiking dewa supaya sang bungkus kinen nyingitake ana ing alas Winangsraya. Ya ing alas kono mengkono bakal ana kaelokaning jagad ya dadi sarana ruwating si bungkus saka panandhange.

Seje papane nanging nunggal caritane, yaiku kang mapan ing Kayangan Suralaya. Yaiku tekane Gajahsena kang bakal jaluk supaya dililani urip manunggal karo para dewa, ananging para jawata ora ngidini satemah dadi pancakara lan para dewa.

Gajah Sena            : “ e e e, ora pangling iki tetungguling para jawata. Bathara Endra…iki! “

Bathara Endra : “ ya dhasar kepara nyata, ulun bathara Endra. He…Gajah Sena yen kena tak elingake, wurung anggonmu darbe gegayuhan urip bareng lan para dewa dewandara ing kayangan. Awit sira iki isih sipat titah.”

Gajah Sena            : “ ha.. embuh ra idhep, bakune aku pengin urip ing kayangan.”

Dewa Endra           : “ wow.. jebul ora kena digawe becik. Ora enggal lunga saka kayangan kene sampluk canela pecah sirahmu! “

Gajah Sena            : “ oi…sing ngati-ati, gadhing pedhot igamu! “

Akhire dumadi perang tandhing Gajah Sena mungsuh Bathara Endra, wusanane Bathara Endra kalah. Gilir gumanti para dewa ngadhepi kridahaning Gajahsena, kawiwitan bathara Endra, bathara Brama lan Bathara Yamadipati, nanging kabeh padha asor ing yuda.

Bathara Naradha kang dadi sesepuhing para dewandara banjur mrepegi marang Bathara Bayu lan paring dhawuh kinen golek dalan kanggo ngadhepi pangamuking Gajahsena. Awit saka panemune Bathara Bayu Gajahsena kinen kadhawuhan tumuju ing wana Winangsraya saperlu angruwat putrane Prabu Pandhu kang isih awujud bungkus. Banjur bathara Naradha marepegi Gajahsena.

Bathara Naradha      :” he…Gajahsena Manawa sira pancen penging nemu dalaning kaswargan iki ana sranane”!

Gajahsena              : “ hiya enggal tuduhna apa kuwi saranane?”

Bathara Naradha   : “ sira tumuli nyedhaka ing Wana Winangsraya, Manawa sira bisa ngruwat marang si Bungkus, ya ing kana sira bakal antuk dalaning kaswargan lan sira bisa urip manunggal bareng para jawata” .

Gajahsena              : “ ora ngomong wiwit mau! “

Ganti kang cinarita kang mapan ing tengahing wana Winangsraya, Batahara Bayu kang nyedaki marang si Bungkus banjur maringi kanugrahan kang awujud panganggon jangkep. Ora let suwe katon tekane Gajahsena lan banjur angruwat marang si Bungkus. Gajahsena namakake gadhing lan tumanjep dadi bedhaing bungkus. Eloking kahanan saka jero bungkus jumedhul manungsa kang wus gedhe, rumangsa kelaran metu saka jero bungkus satrus dadi pancakara sakarone.

Pungkasane dadi pancabakah Gajahsena asoring yuda katuwek kuku pancanaka satemah ilang musna nyawiji lan sang bungkus sing wus dadi manungsa lumrah iku.Sirna jasad sang gajah. Roh lan daya kekiatanipun manjing jroning angga sang bungkus.

Praptane Bathara Narada. Si Bungkus tumakon marang Bathara Bayu lan Naradha:

Bathara Naradha : “ prekencong pak pak pong waru dhoyong kalicodhe mangetan iline…, ho jebul gagah temenan bocah iki. Pendah bungahe wong tuwane manawa

nyumurupi putrane iki.. “

Bungkus             :“Heemmm, aku iki sapa?”

Bathara Bayu : “ mangertiya ya ngger sira iku atmajane prabu Pandhu kang mau awujud bungkus. Sarehning sira iku mau sing bisa ngruwat Gajahsena mula sira tak paring jeneng Bratasena. “

Bathara Naradha : “ aku ya bakal menehi jeneng sira ngger,.. yaiku Werkudara. Kersane para dewa sira besuk bakal dadi satriya utama kulup. “

Rawuhe Prabu Pandhu kadherekake para putra yaiku Puntadewa lan Permadi. Prabu Pandhu katon bungah amarga putrane si bungkus wis pecah.

Pandhu               : “ Putraku ger jeneng sira wis ruwat saka panandhangmu ger,..,. Pukulun keparenga kula amaringi pusaka awujud asma putra kula nami …? “

Bathara Naradha :” Iya iya ger… kudu iku. Kwajibane sudarma iku antarane maringi tetenger.”

Pandhu               : “ Kulup sira sun paring tenger Gandawastratmaja, gandawastra iku jejuluk ingsun, atmaja anak. Lire sira iku putrane Pandhu ing Astina. Ayo ger tumuli dak kanthi bali mring praja Ngastina kulup .”

Prabu Pandhu sakwuse maringi jeneng marang putrane bungkus yaiku Gandawastratmaja. Sateruse Bratasena kaboyong kondur mring kraton Astina. Wondene para jawata sami kondur ing kayangan.