Өнертабыс

Бір түрлі өнертабыстар

Өнертабыс дегеніміз бұрын қолданыста болмаған жаңа дүниені жасап шығару немесе затты жасаудың тың әдісін, өзгеше тәсілін ұсыну. 

Моноцикл

Бұл құрылғы - велосипедтің туысы. Оның дөңгелегі біреу, жолаушы соның ішінде отырады. Аяқты жетек арқылы қозғалысқа келтіріледі.

Моноцикл, тіпті жауыннан қорғайтын қолшатырмен де жабдықталған. Бұл өнертабыс қаншалықты төзімді екені белгісіз. Бірақ көп көлемде шығарылмауына қарағанда, кемшіліктері болған тәрізді.

Дайверлердің керек-жарағы

1881 жылы ойлап Америка тумасы Стивен Таскер суға сүңгушілерге арнап үлкен қысымға шыдауға мүмкіндік беретін, металдан әзірленген гидрокостюм ойлап тапқан. Сол сәтке дейін теңізшілер жұмсақ сүңгуірлер костюмін пайдаланып жүргенін айта кету қажет. Ал қысымға төзімді жүйесі бар алғашқы қатты скафандр өндіріске 1900 жылы енгізілді, бірақ бұл Стивен Таскердің гидрокостюмы емес еді.

Қалпақ -парашют

Егер ғимаратта өрт шықса, не істеу керек? Жерге түскенде қатты зақымданбау үшін арналған парашют керек. Парашют туралы идея Леонардо Да Винчи заманынан бері адам қиялында үнемі болды, ал оны адамның басына бекітіп қою туралы ой бірінші рет Оппенгеймер мырзаға келіпті.

Сондай-ақ «дарынды» өнертапқыш қалың платформалы аяқ киім киюді де ұсынған екен. Онымен жерге түсу қолайырақ болады-мыс.

Тауыққа арналған көзілдірік

Өнертапқышты тауықтардың қайта-қайта бір-бірінің көздерін шоқығаны қатты уайымға салған тәрізді. Ол ұябасарларға арнап қорғаныс көзілдірігін ойлап тапқан екен.

Қалпақты көтеріп тұрғыш

Бұрындары ер адамның барлығы қалпақ киетін, ал әйел адамдардың жанында шешіп қоятын. Уақыт өте әйел адамдар жиі кездесетін болғандықтан, ерлер қайта-қайта қалпақтарын шешуге ерініп, оларды көргенде тек бас киімдерін аздап жоғары көтеретін болады.

Бірақ кейбір еріншектер үшін бұл қарапайым әдеттің өзі тым ауыр болып көрінгендей. Бәлкім сол себепті Бойл мырза қалпақты қолсыз-ақ аздап жоғары көтеретін құрылғыны ойлап тауып, патенттеді.

Кері бәтеңкелер

Ғимаратта өрт шықты деп ойлаңыз, ал сізде жоғарыда аталған басыңызға бекітілетін парашют жоқ. Өрт сөндірушілер кіріп жатқан баспалдақпен түсуге тура келеді. Баспалдақта кептеліс, сізге төмен түсу қажет, ал өрт сөндірушілер өртті сөндіру үшін жоғарыға қарай бет алуда. Дәл осы сәтте Эдмонд Деннис мырзаның бәтеңкелері қажетімізге жарап қалуы мүмкін. Баспалдаққа астыңғы жағынан жармасып аласыз да, алға баса бересіз.

Әмбебап велосипед

Экстремал-жаңашылдар барлық кезеңдерде де болған. Бұл велосипед трюктер мен цирк өнерін көрсету үшін арнайы ойлап табылған. Автордың ойы бойынша, оның көмегімен толық айналым жасауға болады.

Белгілі болғандай, қаншалықты ойға қонымды болып көрінсе де, бұл құрылғы сызбасы жасалғаннан кейін, әрі қарай дамыған жоқ. Мүмкін біреу-міреу нобайын көріп қалып, инженерлік ойдың жауһарын жасауға шешім қабылдайтын шығар?

Темекіге қарсы бетперде

Он тоғызыншы ғасырдың соңында темекі шегушілерді әлі сынға ала қоймаған еді. Олар адамдар арасында, қалаған жерлерінде шылым шеге беретін. Біз қазіргі уақытта темекі шегетіндерді оқшаулаған тәрізді бұрындары мұндай зиянды әдеті жоқтар оқшау отыруға мәжбүр болатын. Темекіге қарсы бетперде патенті — ертедегі 1877 жылдан жеткен, көмек сұраған адамдардың жан айқайы. Бізге белгілі болғандай, бұл бетперде кеңінен қолданыс таба қоймаған.