Pawiyatan Saben Dina Ana ing Ngomah lan Sekolah

Pawiyatan Saben Dina Ana ing Ngomah (serial pandemi)

disusun oleh Pak Fuad

Sembahyang esuk ...

• Jenengku Umar. Aku bocah kelas 3 ana ing SD Al-Amin Sinar Putih.

• Saben dina aku tangi turu jam setengah lima. Tangi turu aku banjur menyang kolah snei. Sawise snei, aku banjur wudhu kanggo salat subuh. Aku salat subuh menyang ana ing mesjid bareng bapakku. Bubar salat subuh aku mulih banjur nglempiti kemul lan nata bantal guling.

Wayah esuk ngrewangi wong tuwa...

• Rampung reresik kamar, aku ngrewangi ibu nyapu njeron omah. Sawise nyapu njeron omah banjur sisan nyapu latar. Ibu lan bapakku seneng menawa aku sregep ngrewangi gawean omah.

• Udakara jam enem esuk, aku adus banjur ganti klambi lan siap-siap sarapan. Kabeh mau rampung udakara sejam. Jam pitu, aku pamit bapak lan ibu kanggo siap-siap sinau daring. Buku, pulpen, lan uga leptop wis cumawis ana ing meja. Jam setengah wolu, biasane pak guru wis mbukak kelas daring liwat internet kanthi piranti hape utawa leptop.

Sinau Daring ....

Anggonku sinau daring bareng pak guru paling suwe rong jam. Sawise sinau daring, biasane ana tugas saka pak guru. Aku langsung garap tugas saka pak guru supaya ora numpuk lan krasa abot.

Udakara jam setengah rolas, kabeh gaweanku sinau wis rampung. Aku banjur siap-siap salat luhur bareng ibuku ana ing ngomah. Rampung salat luhur, aku madang bareng ibu. Sawise madang, aku banjur turu.

Ing wayah sore ...

• Aku tangi turu awan udakara jam setengah telu. Sawise tangi, aku adus banjur siap-siap salat asar. Bubar salat asar, aku biasane pit-pitan mubeng kampung. Ora perlu adoh sing penting kanggo nglipur ati lan ngungak kahanan.

• Rampung pit-pitan, aku mulih lan ngrewangi bapak ibu makani kewan. Ana kucing, pitik, lan manuk. Aku seneng duwe kewan akeh.

Wayah wengi ...

• Jam enem, aku reresik banjur menyang mesjid salat maghrib. Aku ora lali nganggo masker lan tertib prokes. Rampung salat, aku mulih banjur ngaji ana ing ngomah tekan wayahe isya.

• Adzan isya, aku menyang mesjid bareng bapak. Rampung isya, biasane aku madang. Sawise madang, aku sinau sedela. Udakara jam sanga, aku mapan turu. Kui mau kegiyatanku saben dina.

Piye lur, ana sing arep takon ora?

Menawa sliramu pengen takon, matur karo pak guru ya.

Muga-muga ana gunane critaku iki mau.