Waosan 1
Peksi Jatayu
……………………………………………………………………………………………………………
Sinta sagedipun namung nangis nyuwun welas asih, saha ngrerintih sedhih. Sekar cundhuk, gelang, tuwin kalungipun sami dhawah pating kecècèr. Sinten kémawon ingkang sumerep kawontenan saha polahipun, punapa déné mireng tangis tuwin pasambatipun Sinta temtu tumut trenyuh sedhih. Kéwan-kéwan wana, wit-witan, tetuwuhan, rerumputan kémawon tumut trenyuh lan sedhih. Redi-redi mèndel mbisu sisah. Angin boten lumampah. Angkasa timbreng nglemeng nggameng kasaput méga mendhung. Srengéngé surem, sorotipun kucem. Sadaya isining jagad tumut nandhang sungkawa. Nanging wonten tiyang satungggal ingkang boten gadhah raos welas, inggih punika Rahwana.
Dumugi ing negari Alengka, Sinta dipunpamèri kaéndahaning kraton, barang-barang, saha prabot ingkang sakalangkung èdi pèni, mawarni-warni mas, inten, lan barléyan. Sinta boten gumun malah kepara boten ngrèwès. Rahwana nyobi ngarih-arih dhateng Sinta, nanging Sinta malah cariyos bilih piyambakipun tansah ènget lan tansah setya dhateng Rama. Midhanget aturipun Sinta makaten kalawau, Dasamuka muntab lan pratéla menawi Sinta boten teluk badhé dipunpejahi. Sinta tetep teguh santosa ing budi. Rahwana sansaya jèngkèl, lajeng dhawuh supados Sinta dipunjagi déning para raseksi ingkang galak-galak lan ndrawasi.
Ing tengah wana, Rama anggènipun mbujeng kidang boten angsal damel. Rama lan Lesmana wangsul tumuju papanipun Sinta, nanging Sinta boten wonten. Rama lan Lesmana lajeng madosi Déwi Sinta. Ing tengahing margi, Rama manggihaken sekar cundhuk sarta sapérangan panganggénipun Sinta pating kecècèr. Rama lajeng nginten menawi Sinta kadhusta déning tiyang. Rama duka sanget mila jagad saisinipun badhé kajungkir walik, nanging Lesmana énggal atur pangarih-arih saéngga Rama lilih panggalihipun. Kekalihipun lajeng nglajengaken lampah madosi Déwi Sinta. Ing satunggaling panggènan, Rama lan Lesmana kepanggih kaliyan Jatayu ingkang taksih menggèh-menggèh kados badhé koncatan nyawa. Sanajan makaten kawontenanipun, Jatayu taksih saged cariyos lan atur pitedah bilih Sinta kadhusta déning pandung lan kabekta tumuju dhateng nagari Alengka. Purna anggènipun matur, Jatayu dumugining pejah. Nalika raganipun dipunbesmi déning Rama, keluking latu kados asung pitedah ing pundi peneripun Negari Alengka lan wonten swanten gaib ingkang suka pitedah caranipun saged kepanggih kaliyan Sinta.
Déwi Sinta dumugi ing negari Alengka amargi ….