"Үш кісі жасырын бас қосып құпия сөйлессе, сөзсіз, олардың төртіншісі кім болмақ" делінген "Мужәдәлә" сүресінде?

Аллаһ Тағала мүминдерге Пайғамбарымызбен оңаша жолығып сөйлескілері келген жағдайда не істеу керектігін бұйырған әрі бұны: "...Өздерің үшін һәм қайырлы һәм жүрек тазалығы әрі шынайылық тұрғысынан ең дұрыс іс болмақ", – деген "Мүжәдәлә" сүресінде?

Аллаһ Тағала "Мужәдәлә" сүресінде: "Алла олардың жүрегіне иманды тасқа қашалғандай етіп жазған әрі оларды Өз тарапынан бір не нәрсемен қолдауда", – деген?

"Олардан бұрын Мәдинаны мекен етіп, иман құшағына оранғандарға келсек, олар өздеріне Алла жолында қоныс аударып келген мұһажирлерді шын жүректен жақсы көреді және оларға берілген олжаны немесе басқа да дүниені іштей қызғанбайды һәм қажетсінбейді. Тіпті өздері мұқтаж бола тұра оларды өздерінен артық көреді". Аятта кімдер жайлы сөз етілген?

Аллаһ Тағала "Хашр" сүресінде жәбірейлерді (яһуди) соғысқа итермелеген мұнафиқтарды не нәрсеге ұқсатқан?

Аллаһ Тағала "Хашр" сүресінде нені "тауға түсіргенімізде, оның (алыптығына қарамастан) Аллаға деген ерекше құрметі мен қорқынышынан бас иіп, күл-паршасы шыққанын көрер едің" дейді?

Аллаһ Тағаланың "шексіз билік иесі" деген мағынаға саятын көркем есімін табыңыз.

Аллаһ Тағаланың "Өзі қандай мінсіз әрі пәк болса, күллі ғаламды да әрдайым таза ұстаушы" деген мағынаға саятын көркем есімін табыңыз.

Аллаһ Тағаланың "күллі жаратылысты бақылауында ұстаушы һәм қорғаушы" деген мағынаға саятын көркем есімін табыңыз.

Аллаһ Тағаланың "әр жаратылысқа өзіне сай әрі жарасымды кескін-келбет беріп, бейнелеуші" деген мағынаға саятын көркем есімін табыңыз.

"Саф" сүресінде Аллаһ Тағала "істемейтін істі айтуды" не нәрсеге балаған?

«Уа, Исрайыл ұрпақтары! Мен сендерге келген Алланың елшісімін. Өзімнен бұрын түскен Тәураттағы ақиқаттарды растау және өзімнен кейін келетін Ахмет есімді елшіні сүйіншілеу үшін жіберілдім». Қай пайғамбардың сөзі?

Иса пайғамбардың Аллаға барар жолдағы арқа сүйер жәрдемшілері кімдер еді?

Аллаһ Тағала "Жұма" сүресінде Тәуратты үйреніп, оны өзгелерге де үйрету және оның үкімдерін басшылыққа алып өмір сүру міндетін арқалағаннан кейін оны тиісінше алып жүре алмағандарды не нәрсеге теңеген?

"Оларды көргеніңде түр-тұлғаларын ұнатып қаласың. Сөздеріне еріксіз құлақ түресің. Шынында, олар дуалға сүйеулі бөренелер секілді". Аятта кімдерден сөз етілуде?

"Талақ айтқан әйелдеріңді (зина секілді) анық арсыздыққа бармайынша, (иддат мерзімі аяқталмай тұрып) ......". "Талақ" сүресіндегі аятты толықтырыңыз.

"Уа, иман келтіргендер! Өздеріңді һәм отбасыларыңды (имандылыққа, адамгершілікке баулу арқылы) отыны ........ тұратын алапат оттан қорғаңдар!" Аяттағы бос орынды табыңыз.

Қай пайғамбардың әйелі күпірлікке батып, жұбайларына опасыздық жасаған?

«Уа, Раббым! Мен үшін Өз құзырыңда, жұмақта бір үй тұрғызғайсың! Мені Перғауыннан және оның жаман ісінен (зұлымдығынан) сақтай көр! Мені бұл залым қауымнан құтқара көр!». Кімнің дұғасы?