Module 4: Kabihasnang Klasiko sa Pagunlad ng kamalayan

Module 4: Kabihasnang Klasiko sa Pagunlad ng kamalayan

Kabihasnang Minoan, Mycenaean, at Greece

Aralin 1

Kabihasnang Minoan, Mycenaean, at Greece

Ang kauna-unahang sibilisasyon sa kanluran ay pinangunahan ng mga Griyego. Ang naibahagi nila sa iba’t ibang larangan ng pamumuhay ay nagbigay daan sa paglago at pag-unlad ng Sibilisasyong Kanluranin. Sa araling ito, matutunghayan at mauunawaan mo ang pagsibol ng Sibilisasyong Griyego at ang mga kontribusyon nito sa Sibilisasyong Kanluranin at sa daigdig. Sa modyul na ito, pagtutuonan mo ng pag-aaral ang mga mahahalagang pangyayari sa pagsibol ng kabihasnang klasikal ng Greece. Susuriin din ang mga mahahalagang kontribusyon ng Kabihasnang Greek na nagpatunay sa kagalingan ng mga Griyego sa iba’t ibang larangan. 

Balikan

Sa nakaraang aralin, natalakay ang mga mahahalagang ambag ng mga sinaunang kabihasnang sumibol sa daigdig. Ang mga kontribusyong ito ang nagpayabong sa kultura at kabihasnan na napaunlad ng mga sinaunang tao.

Subukan mong sagutin ang sumusunod na katanungan batay sa iyong natutuhan sa nakaraang aralin.

• Sa iyong pagkaunawa, bakit kahanga-hanga ang mga kontribusyon ng mga sinaunang kabihasnang Mesopotamia, Indus, Tsino, at Egypt?

• Anong pagpapahalaga ang natutuhan mo mula sa kasaysayan ng mga sinaunang kabihasnan sa daigdig? 

Tuklasin

Masagot mo kaya? Pagkatapos ay basahin mo ang teksto ng aralin at unawain mo ang mga kataga at salitang iyong pinag-isipan sa bahaging ito. Hanapin at bilugan sa puzzle box ang mga salitang nakapaloob sa loob ng kahong may kaugnayan sa tatalakaying aralin. Isulat ang iyong sagot sa sagutang papel. 

Knossos

metropolis

arena

Crete

Hellas

Hellenic

acropolis

agora

polis

bricks

Suriin

Maglalakbay tayong muli sa nakaraan, aalamin natin kung paano naging tagapaghubog ng Sibilisasyong Kanluranin ang mga Griyego. Ating susuriin kung paano nagsimula ang iba’t ibang sibilisasyong bumuo ng matatag na Sibilisasyong Griyego? Tutuklasin mo iyan sa araling ito. Ang lupain ng Gresya ay mabato at bulubundukin. Ito ang pangunahing naging sagabal sa mabilis na daloy ng komunikasyon sa mga pamayanan. Naging mabagal ang paglago ng mga kaisipan at teknolohiya. Subalit ito rin ang naging dahilan upang ang bawat lungsod-estado ay magkaroon ng kani-kanilang natatanging katangian na nagpayaman sa kanilang kultura. Ang mga mainam na daungan na nakapaligid sa Gresya ay nagbigay-daan sa maunlad na kalakalang pandagat na naging dahilan ng kanilang maunlad na kabuhayan.

Kabihasnang Minoan 

Ang unang kabihasnang nabuo sa Crete ay tinatawag na Minoan hango sa pangalan ng tanyag na hari ng pulo, si Haring Minos. Ayon sa mga arkeologo, ito ay nagsimula sa Crete mga 3100 B.C.E. Ang kabisera ng kabihasnang Minoan ay ang Knossos, matatagpuan sa hilagang bahagi ng pulo. Kilala ang mga Minoan bilang mahuhusay gumamit ng metal at iba pang teknolohiya. Nakatira sila sa mga bahay na yari sa laryo (bricks) at may sistema sila ng pagsulat. Magagaling din silang mandaragat. 

Kabihasnang Minoan

Noong 1899, nagsagawa si Sir Arthur Evans, isang English na arkeologo, ng paghuhukay sa Knossos. Ito ay isang matandang lugar na binanggit ni Homer, ang bantog na manunulat, sa kanyang mga akdang Iliad at Odyssey. Natagpuan niya ang mga gumuhong labi ng isang malaking palasyong yari sa makinis na bato. Maraming palapag ang palasyo at ang mga pasilyo nito ay tinutukuran ng mga haliging kahoy. Ang mga hagdanan nito ay malapad at yari sa pino at puting gypsum. Ang mga dingding ay napapalamutian ng makukulay na fresco.