Түйе сүтінен әртүрлі тағамдар жасалады. Одан құрт, май, ірімшік әзірленеді. Шұбаты әрі сусын, әрі тамақ. Әсіресе, емдік қасиеті күшті.

Мәтіннің қай түрі екенін табыңыз.

Қасына серік ергеннен бері Көксерек зорайып қатты өсті. Аяқтары жуандап, жүндерінің бәрі де қалыңдап ұзарып, өзі жуан, өзі мықты көкжал болып алды. Қыс іші болса да жоны шығып, алқымы түсіп, семіріп кетті.

Мәтіннің қай түрі екенін табыңыз.

Олар таңертеңнен бастап-ақ тауға баруға жиналған. Бірі заттарын жолдорбаға салып, екіншілері ойынға керек жабдықтарды велосипедтеріне тиеп алды. Енді жетекшілерінің келуін күтіп тұр. Кейбірі тықыршып, тауға жеткенше асығуда. Жоспарланған істерінің орындалатына қуанып тұрған жайы бар.

Мәтіннің қай түрі екенін табыңыз.

Бөлменің іші терезеден түскен күн сәулесінің жарығымен ап-анық көрініп тұр. Төбеде алтын шынжырмен бекітілген аспалы хрустальді сәнді шам. Еденде қалың, ашық түсті ұалы кілем. Терезеге сол кілемнің түсіне үйлесімді қымбат торғын перде ілініпті. Бөлменің оң жақ шетіне үлкен пианино қойылған. Пианиноның жанындағы журнал үстелінің үсті толған нота қағаздары.

Мәтіннің қай түрі екенін табыңыз.

Мен үшін тілдің аса маңызды құрал екендігіне көзім жете түсті. Өйткені, біріншіден, тіл болмаса мен ешкіммен араласа алмас едім. Араласа алмаған соң, өзіңе дос, жолдас табу да мүмкін емес. Екіншіден, тілсіз айналаңда болып жатқан құбылыстардың мәнін де түсіне алмайсың. Олай болса, тілсіз өмірдің ешқандай құны болмайды. Үшіншіден, ата-анамның мені сүйіп еркелеткен сөздеріндегі мейірім де тек тіл арқылы жеткізіледі емес пе? Міне, сол себепті де мен тілді құрметтеп, дұрыс қолдануым керек.

Мәтіннің қай түрі екенін табыңыз.

Ерте кезде біздің қазақ елінде, Жетісу жерінде бір керемет бағбан мол өмір кешіпті. Шалдың баласы болмапты. Жертөлесінің қасына өзі еккен кішкене алма бағынан басқа түгі жоқ екен.

Мәтіннің қай түрі екенін табыңыз.

Қысқы азық дайындап әуре болмайтын аңдар да бар. Олар жылы уақытта көп қоректенеді. Әбден семіреді. Денелеріне қалың май жинайды. Май оларды қысқы аштықтан да, суықтан да қорғайды.

Мәтіннің қай түрі екенін табыңыз.

Біреуді туған күнмен құттықтағың келгенде, кітап сыйлағаның дұрыс-ақ. Өйткені кітап – ең жақсы сыйлық. Кез келген кітапты бере салғаның дұрыс емес. Мазмұны жақсы кітапты таңдай білу керек.

Мәтіннің қай түрі екенін табыңыз.

Жиырма жасар жас жігіт шатырдың алдында жанымен жатқызылған есек арбаның үстінде домбыра шертіп отыр еді. Майшамның жарығы маңдайына шағылысып, шыпшып шыққан терімен айқасып жатқандай еді. Домбыраның мойны ары-бері жүгіріп өткен саусақтарының астында тіріліп кеткендей еді. Жас жігіттің қолы домбыраның шегіне жақындаған сайын екеуінің арасында құпияға толы әңгіме жүріп жатқандай еді.

Мәтіннің қай түрі екенін табыңыз.

Бүркіт жыртқыш құс. Оның денесі ірілеу, көзі қырағы болады. Ол қанатын кең жайып ұшады.

Мәтіннің қай түрі екенін табыңыз.

Ежелден адамдар үйді кірпіштен салуды ұнатқан.Себебі, кірпіш суда ерімейді, суықта үгілмейді. Ол күйдірілгендіктен берік болады. Қазір де кірпіш үй құрылысында, өнеркәсіп құрылыстарында пайдаланылады.

Мәтіннің қай түрі екенін табыңыз.

Күн шайдай ашық, жылы еді. Аспанда бұлт жоқ. Жел де жоқ. Айнала қалың иірім-иірім орман. Бойлап, таласа, жарыса шыққан қайың мен қарағай. Және әредік қалың, қарағаймен жарыса шыққан теректер де көрінеді. Қайың мен терек ағаштардың жапырақтары шалғырт тартып, сарғая бастаған...

Мәтіннің қай түрі екенін табыңыз.

Хамит-ұзынша бойлы, жауырынды, тіп-тік, сұр жігіт. Қыр мұрынды, шүңіріктеу қара кер тобылғы көзді, қырқып жүретін сақалы, мұрты бар. Жасы 25-26 жас шамасында. Сом сұлу денесі ылғи сіңірімен шиырылған күшті көк ет еді. Бар денесі серіппелі көк темірден құйып жасағандай. Түйіліп жазылған қиғаштау қасы мен шұңғылдау көзі Хамитте зор қайрат, үлкен қайсарлық бар екенін көрсетеді. Бет-аузы бүркіттің бетіндей.

Мәтіннің қай түрі екенін табыңыз

Бірде ұстазы көзге түртсе көргісіз

қараңғы түнде бір топ шәкірттерімен бірге Ер таудың жолымен жоғары қарай көтеріліп келе жатады. Жолда күн жауып боран болыпты. Шәкірттердің мазасы қашады. Бірақ ұстаздары тоқтауды бұйырмағаңнан кейін, оның артынан ілгері ілби жүре береді.

Жауын толастағанда ұстазы:

- Аяқтарыңа бір нәрсе батты ма? – деп сұрайды. Шәкірттер:

– Батты, - деп жауап береді.

- Сол батқан нәрсені алған да өкінеді, алмаған да өкінеді, - дейді ғалым.

Қараңғыда бораннан әбден қалжыраған шәкірттердің бір бөлігі: «Ақыры өкінетін болғаннан кейін оны алғанда не, алмағанда не?» — деп, табандарына батқан тас секілді нәрсені алуға ерініпті. Ал шәкірттерінің қалған бөлігі: «Ең болмаса алып, не екенін көрейік», - деп ойлап, қалталарына бір-екі түйір белгісіз тасты салып қояды. Ертеңінде таң атқан соң тасты алып қараса гауһар екен. Сонда алмағандар: «Неге алмадық?» – деп, алғандар: «Heгe aз алдық?» - деп өкініпті.

Мәтіннің түрін анықтаңыз.