Wacanen kang patitis !
SRI TANJUNG
Jaman biyen ing negara Sindureja, kang jumeneng ratu asma Prabu Sila Hadikrama. Negarane, subur makmur loh jinawi, tata tentrem kerta raharja, rakyate urip cukup sandhang, pangan, lan papan. Ananging Prabu Sila Hadikrama lagi nandhang dhuhkita amarga Sang Prameswari lagi nandhang gerah ora dhangan-dhangan. Prabu Sila Hadikrama utusan patihe kang asma Raden Sidapaksa nggolekake obat kagem Sang Prameswari. Patih Sidapaksa sowan eyange Sang Bagawan Tambang Petra ing padhepokan, nyuwunake obat kagem Sang Prameswari. Patih Sidapaksa kuwi isih turun Pandhawa, mula saliyane priyantune bagus, gagah prakosa, uga sekti mandraguna.
Ing padepokan, Patih Sidapaksa ketemu prawan sing ayune banget, solah bawane alus manuhara, lan nengsemake pandulu. Prawan ayu mau asmane Dewi Sri Tanjung. Sri Tanjung pancen beda karo prawan-prawan liyane amarga ejatine Sri Tanjung lahir saka ibu widodari. Patih Sidapaksa kepencut marang sejatine Sri Tanjung, kaya tumbu oleh tutup, semono uga Sri Tanjung. Kekarone banjur nambut silaning akrami. Sarampunge palakrama, Sri Tanjung kaboyong menyang kraton Sindurejo lerem ing dalem kepatihan.
Prabu Sila Hadikrama bareng pirsa Sri Tanjung kesengsem, kayungyun mring kasulityane Sritanjung tanpa kinawruhan Patih Sidapaksa. Rina wengi Prabu Sila Hadikrama golek cara piye bisane ngrengkuh Dewi Sritanjung. Ndadekake Prabu Sila Hadikrama kerasukan watak julig culika.
“Patih Sidapaksa, ingsun ngaturaken agunging panuwun, sliramu wis bisa minangkani kersaningsun, Prameswari wis waluya jati kaya wingi uni. Ananging isih ana maneh jejibahan sing kudu koksarirani dhewe, yaiku ngaturake Nawala menyang swargaloka, katur para dewa bukti suka panarimaku marang kabeh kang kaparingake ing negara Sindureja”, pangandikane Prabu Sila Hadikrama ing pasewakan agung.
“Sendika dhawuh Sinuhun, kula pundhi sedaya dhawuh paduka, mugi saged angayahi jejibahan punika”. Patih Sidapaksa nyanggemi kabeh dhawuhe Sang Nata, tanpa ngaweruhi niat satemene saka Prabu Sila Hadikrama sing kepingin nyingkirake Patih Sidapaksa, amarga kepingin nggonjak Dewi Sritanjung. Sejatine Nawala kang dudu diaturake kagem para dewa mau isine “ Sapa sing nggawa Nawala iki arep mbalela maranga para dewa.”
“Yayi Dewi Sritanjung, pun kakang lagi kodheng, amarga kudu ngayahi jejibahan kang mokal kelakone pindhane ngarep-arep udan ing wayah ketiga, cebol nggayuh lintang, apa sliramu kersa paring pambiyantu?” Pangandikake Patih Sidapaksa sarawuhe ing dalem kepatihan.
“Aduh Kangmas Sidapaksa, boten usah godheg panggalih panjenengan, kula sabiyantu panjenengan angayahi jejibahan punika. Kula nggadhah slendhang mustika paringanipun Bapa Rama Raden Sudamala, ingkang nglantaraken panjenengan sowan dhateng para dewa wonten ingswargaloka.” Dewi Sritanjung enggal nyamektakake slendang mustika, minangka srana tindake Patih Sidapeksa tumuju Swargaloka sowan para dewa.
Cecaking crita satekane ing Swargaloka, nalika Nawala diaturake para dewa sakala Patih Sidapaksa diajar lan dipilara amarga dianggep arep mbalela. Patih Sidapaksa lagi weruh yen isine nawala pancen sengaja kanggo nyingkirake piyambake. Amarga saka ora kuwawa nadhahi panandhange, Patih Sidapaksa sambat nyebut para leluhur Pandawa. Para Dewa nembe pirsa yen ta kabeh mung salah paham amarga saka trekahe Prabu Sila Hadikrama, nula banjur dikeparengake kondur menyang Sidureja lan kaparingan kanugrahan.
( Sumber : Kirtya Basa 2014 kelas 7 kaca 130 )
Jaman biyen ing negara Sindureja, kang jumeneng ratu asma Prabu Sila Hadikrama. Negarane, subur makmur loh jinawi, tata tentrem kerta raharja, rakyate urip cukup sandhang, pangan, lan papan. Ananging Prabu Sila Hadikrama lagi nandhang dhuhkita amarga Sang Prameswari lagi nandhang gerah ora dhangan-dhangan. Prabu Sila Hadikrama utusan patihe kang asma Raden Sidapaksa nggolekake obat kagem Sang Prameswari. Patih Sidapaksa sowan eyange Sang Bagawan Tambang Petra ing padhepokan, nyuwunake obat kagem Sang Prameswari. Patih Sidapaksa kuwi isih turun Pandhawa, mula saliyane priyantune bagus, gagah prakosa, uga sekti mandraguna. Paragraf ing dhuwur yen katitik saka struktur teks kalebu perangane……….
