Nawalan ng trabaho si Daniel dahil sa pandemya, pero hindi siya nawalan ng pag-asa dahil alam niyang malalagpasan din ng pamilya niya ang pagsubok na ito. Lahat ng pwedeng pagkakakitaan sa mabuting paraan ay ginawa na niya, sinamahan pa niya ng tiwala sa sarili at pananalig sa Diyos.

Si Marielle ay isang frontliner. Lakas loob siyang humaharap sa laban araw-araw. Tanging dobleng pag-iingat at pananalangin lang ang kanyang dala-dala tuwing humarap sa mga pasyente.

Si Milmar maagang nagigising. Pagkatapos magligpit ng higaan at manalangin, diretso sa kusina para maghilamos at magsipilyo. Nag-ehersisyo, kumain ng masustansiyang pagkain at higit sa lahat hindi siya nagpupuyat. Inaalagaan niya ang kanyang kalusugan dahil ang sabi niya ang katawan daw ang ating puhunan upang maging masaya sa buhay.

Para kay Nanette ang pag-aaral ang pinakamagandang pamana sa atin ng ating mga magulang. Kaya ganoon na lamang ang kanyang pagsusunog ng kilay para makapagtapos ng pag-aaral.

Si Jane ang panganay sa magkakapatid. Gusto niya na kung anong meron siya ay meron din ang dalawa niyang kapatid. Sinisikap niyang maramdaman ng mga kapatid na pantay lang silang tatlo at walang lamangan.

Si Paul ay bago lamang sa pagmamaneho. Maingat, maayos at sumusunod sa batas trapiko. Ayon sa kanya dapat daw ay igalang at sundin ang batas sa kalsada para na rin sa kabutihan ng lahat.

Maalaga sa hayop at halaman si Tita Pops. Ayon sa kanya kung paano natin tratuhin ang ating buhay sana ganon ang pagtrato natin sa mga hayop at halaman dahil katulad natin sila din ay may buhay.

Tiniis ng isang amang frontliner na hindi makasama ang pamilya sa loob ng ilang araw dahil sa covid. Kuntento na lamang siyang makita sa malayo ang mga ito, hindi man lang niya makarga ang kapapanganak pa lamang na sanggol. Ayaw nya kasing magkasakit ang mga mahal niya sa buhay.

Ngayon palang ay nag-iisip na si Bianca kung anong track sa Senior High School ang kanyang kukunin. Mahilig siyang magbake at magluto na sinusundan lang ang recipe book. Pero gusto rin niyang maging doktora. Nalilito sya kung ano ba dapat ang pipiliin nya.